Ni tatizo linalotokana na kuwepo kuumizwa kwa ini kwa muda mrefu, kutokana na visababishi mbalimblai, Ini hilo lililoumizwa kwa muda mrefu huwa na makovu yaliyotapakaa karibu ini zima na kulifanya lisinyae na mwisho kushindwa kufanya kazi.

Mgonjwa huweza kukaa na tatizo hili kwa muda mrefu bila kutokuwa na dalili na inaweza kufahamika pale anapofanyiwa vipimo hospitali hasa ultrasound kuangalia ugonjwa mwingine (incidental findings), takriban asilimia 40 ya wagonjwa huwa hawana dalili. Dalili hizo za kusinyaa kwa ini ni pamoja na mwili kukosa nguvu, kukonda, kutapika damu, kujaa maji tumboni, kuvimba miguu, kuchanganyikiwa, kwa wanaopata dalili kama kujaa maji tumboni, kutapika damu au kupata choo chenye damu, cheusi au kuchanganyikiwa nafasi ya kuweza kuishi zaidi ya miaka mitano ni asilimia 50, hii ina maana wengi hufariki chini ya miaka hiyo.

Mambo ambayo husababisha Ini kuumia kwa muda mrefu na hivyo kusinyaa na kushindwa kufanya kazi ni pamoja na kunywa pombe kali au kupitiliza, virusi vinavyoshambulia Ini, kichocho, dawa, kemikali zenye sumu, magonjwa ya kurithi yanayoshambulia Ini, kinga za mwili kupoteza mwelekeo na kuanza kushambulia Ini.

Vipimo kadhaa huweza kubaini ukubwa wa tatizo hili, kama vile ultrasound, vimeng’enyo vya ini kupitia kupima damu, kupima uwepo wa virusi ini, CT scan na hata MRI ingawa vipimo hivi ni gharama kubwa sana na havipatikani kirahisi.

Matibabu ya ugonjwa huu ni upasuaji wa kubadilisha ini na kuwekewa ini la mtu mwingine ( Liver Transplant ) ni wazi upasuaji huu haufanyiki hapa nchini, hufanyika katika hospitali zenye uwezo mkubwa nje ya nchi. Pia upatikanaji wa ini la mtu mwingine ni kazi sana, kwani huhitaji mtu huyo awe amepoteza maisha (mfano labda amepata ajali na kufariki hivyo ini lake kutolewa haraka kuhifadhiwa na kuwekewa yule ambaye ini lake limesinyaa na halifanyi kazi). Aidha wanasayansi wanahangaika kutafuta dawa ya kuzuia makovu hayo kutokea kwenye ini na hivyo kufanya lisinyae.

Damu zote anazoongezewa mgonjwa hutoka katika maabara za Serikali zijulikanazo kama ‘damu salama’, damu hizi huwa zimefanyiwa uchunguzi wa kina kukwepa kumdhuru mgonjwa)